Farah Macallin ayaa sheegay in isku dayga kooxaha aan dowliga ahayn ay awood ku raadsadaan xoog iyo hub uu yahay arrin ay tahay in lagu wajaho awood ka sarreysa tan ay haystaan.
Xildhibaanka ayaa xusay in dowladaha nugul ay dhibaato weyn ka dhaxlaan hoggaan fulineed oo tabar yar, isaga oo ugu baaqay Madaxweyne Xasan Sheekh Maxamuud inuu sii xoojiyo dadaallada lagu mideynayo Soomaaliya.
Sidoo kale, wuxuu sheegay in xasilloonida, ilaalinta midnimada dhuleed iyo sugidda kala dambeynta ay ka muhiimsan yihiin in dalka uu galo xaalad burbur iyo awood qaybsiga kooxaha hubeysan.
Farah Macallin ayaa carrabka ku adkeeyay in nidaamka qabqablayaasha hubeysan aanu meel ku lahayn dowlad casri ah, isaga oo sheegay in dhibaatooyinka maamulka lagu sixi karo hannaan siyaasadeed iyo waqti, balse aan lagu xallin karin hub iyo rabshado.
Hadalladan ayaa ku soo beegmaya xilli ay Dowladda Federaalka Soomaaliya waddo howlgallo amni iyo hub ka dhigis ah oo ka socda qeybo ka mid ah Muqdisho.
