Guddoomiyihii hore ee Maxkamadda Sare, Baashe Yuusuf Axmed oo qoraal soo saaray ayaa ka horyimid xilka qaadistii uu xalay ku sameeyay Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud.
Baashe ayaa sharci darro ku tilmaamay tallaabada uu qaaday Madaxweynaha, isaga oo shaaca ka qaaday in xilka qaadista lagu sameeyay ay baalmarsan tahay mabaadi’da dastuuriga ah ee sarreynta sharciga, kala sarreynta awoodaha laamaha dowladdda, iyo madaxbannaanida Garsoorka dalka.
Sidoo kale, wuxuu hoosta ka xariiqay in ujeedka ugu wayn ee laga leeyahay tallaabadan ay tahay in lagu carqaladeeyo dacwad uu sheegay in laga furay dastuurka cusub, taas oo ay horay Maxkamadda Sare ugu gudbiyeen xubnaha mucaaradka dalka.
“Sidaas darteed waxay Maxkamadda Sare ku dhawaaqday in ay waxba kama jiraan (baadil) tahay xil ka qaadista lagu sheegay qoraalka laga soo dhigay bogga Facebook ee Madaxtooyada,” ayaa lagu yiri warqadda uu saaray guddoomiye Baashe Yuusuf Axmed.
Waxaa kale oo uu bayaanka intaas kusii daray “Maxkamaddu waxay faraysaa madaxtooyada in uu ku dhaqmo Dastuurka Dalka, ilaalinaayo Madaxbannaanida Hay’adda Garsoorka iyo Sarreynta sharciga asagoo maanka ku haya in uu yahay ilaaliyaha iyo horumariyaha Dastuurka”.
Falcelintan ayaa timid, kadib markii xalay Madaxweyne Xasan Sheekh Maxamuud uu xilka ka qaaday Guddoomiyihii Maxkamadda Sare ee dalka, Dr. Baashe Yuusuf Axmed, isaga oo jagadaas u magacaabay Garyaqaan Ibraahim Iidle Suleymaan.
