Dowladda Turkey ayaa markii ugu horreysay si rasmi ah u soo bandhigtay gantaal cusub oo lagu magacaabo YILDIRIMHAN, kaasoo lagu tilmaamay mid ka mid ah hubka casriga ah ee ugu horumarsan ee dalkaasi sameeyo.
Gantaalkan ayaa la sheegay inuu yahay nooca ballistic-ga ah ee xawaare aad u sarreeya leh (hypersonic), isla markaana awood u leh inuu gaaro masaafo dhan 6,000 kiiloomitir, taasoo ka dhigeysa mid gaari kara bartilmaameedyo fog oo ku kala yaalla qaarado kala duwan.
Wararka la xiriira gantaalkan ayaa tilmaamaya in uu ku socda xawaare gaaraya 25 Mach, taasoo micnaheedu yahay inuu 25 jeer ka dheereeyo xawaaraha codka. Xawaare intaas la eg ayaa ka dhigaya mid aad u adag in la ogaado ama la joojiyo marka uu hawada ku jiro, maadaama nidaamyada difaaca cirka ee caadiga ah ay inta badan la tacaali waayaan gantaallada hypersonic-ka ah. Tani waxay sare u qaadaysaa awoodda weerar iyo difaac ee Turkiga, isla markaana u oggolaaneysa inuu yeesho saameyn militari oo ka baxsan xuduudihiisa.
Soo bandhigista YILDIRIMHAN ayaa sidoo kale muujineysa dadaalka joogtada ah ee Turkiga uu ugu jiro inuu yeesho awood militari oo madax-bannaan, isagoo yaraynaya ku tiirsanaanta hubka dibadda laga keeno. Dowladda Turkiga ayaa sannadihii la soo dhaafay si weyn u maalgelisay warshadaha difaaca, taasoo keentay horumar muuqda oo laga sameeyay diyaaradaha aan duuliyaha lahayn, gantaallada, iyo nidaamyada difaaca cirka.
Falanqeeyayaasha arrimaha militariga ayaa sheegaya in haddii xogta la shaaciyay ay sax noqoto, gantaalkan cusub uu si weyn u beddeli karo isu-dheellitirka awoodaha militari ee gobolka. Masaafo ahaan, wuxuu gaari karaa meelo ka mid ah Bariga Yurub, Bartamaha Aasiya, iyo qaybo ka mid ah Afrika, taasoo siinaysa Turkiga awood uu ku gaarsiiyo fariimo istiraatiiji ah oo xooggan.
Dhanka kale, horumarkan ayaa imanaya xilli tartanka hubka casriga ah uu sii xoogeysanayo, gaar ahaan gantaallada hypersonic-ka ah, oo ay horey u sameeyeen dalal waaweyn sida Russia, China, iyo Mareykanka. Ku biirista Turkiga ee kooxdan dalalka leh teknoolojiyadda noocan ah ayaa sare u qaadi karta tartanka, isla markaana keeni karta isbeddel cusub oo ku yimaada amniga caalamiga ah.
Sidoo kale, waxaa la sheegay in gantaalkan cusub uu dhaafayo xagga masaafada iyo xawaaraha qaar ka mid ah gantaallada ay horay u adeegsan jirtay Iran, taasoo muujineysa in Turkiga uu doonayo inuu noqdo awood militari oo la tartanta dalalka gobolka iyo kuwa caalamkaba. Arrintan ayaa laga yaabaa inay keento xiisado cusub, balse sidoo kale waxay ka tarjumeysaa heerka horumar ee tiknoolajiyadda difaaca ee Turkiga.
