diyaarad nooca Qumaatiga ah ee loo yaqaano Helicopter lagu baadi goobayo qaar kamid ah madaxdii maanta lagu waayey wabiga Shabelle xili ay la socdeen doonyo yar si ay iskaga kala gooshaan xaafadaha kala duwan ee magaalada Baladweyne.
Qaramada Midoobe ayaa ku yaboohday diyaaradani si loo soo bad baadiyey madaxda oo qaarkood hore loo helo amaba la bad baadiyey kadib markii ay la gadoontay doontii ay la socdeen.
Dadka doonta la socday ayaa u badnaa masuuliyiin ka titsan Hir Shabelle, ciidamo la socday iyo shacab kale, kuwaas oo qorshahoodu ahaa sidii ay u gaadhi lahaayeen deegaanka Ceel Jaale oo ay gaadheen inta badan dadkii ka barakacay fatahaadihii wabiga Shabelle.
Ku dhowaad 20 qof ayaa ka dabaashay doonta markii ay dhacday kuwaas oo hal haleel ku koray saqafyada sare ee uu leeyahay masjid halkaasi ku yaalay, waxaana saraakiil la hadlay warbaahinta ay sheegayeen in dadka bad baaday ay kamid yihiin Duuqa degmada iyo gudoomiyihii hore ee gobolka Hiiraan hasa ahaahee biyaha weli lagu la’ yahay ku dhowaad 10 qof oo uu kamid yahay la taliyihii dhinaca haweenka ee madaxweynaha Hir-Shabelle.
Masuuliyiin ka socota dowladda iyo saraakiil ka tirsan Qaramada Midoobe ayaa xiligani dadaal ku bixinaya bad baadinta madaxda weli la la’ yahay, waxaana diyaaradani ay weli dul heehaabaysaa wabiga Shabelle dushiisa si ay bal xog uga hesho madaxda la waayey.
