Agaasimaha guud ee hay’adda sirdoonka Kenya (NIS) Nuuradiin Xaaji ayaa lagu baaqay inuu is-casilo, kadib sababo la xiriiro afduubyo iyo dad la waayay.
Falalkan oo dalka Kenya ku soo badanayay muddooyinkii dambe kadib waxay koox ololeeyeyaal ah ugu baaqeen inuu is-casilo Nuuraadiin, sida uu qoray wargeyska Daily Nation ee kasoo baxa Kenya.
Hay’adda Justice Alliance, iyada oo u sii marinaysa isu-duwaha hay’adda ee Kennedy Omulo ayaa sheegtay inay nasiib darro tahay in NIS lala xiriiriyo afduubka Leslie Muturi sida uu ku eedeeyay aabbaha dhibbanaha, oo sidoo kale ah wasiirka adeegga dadweynaha iyo horumarinta raasamaal ee golaha xukuumadda, Justin Muturi.
Ururka bulshada rayidka ah ayaa su’aal galiyay doorka NIS ay ku leedahay afduubka loo maleenayo in ay dowladda ku dhaliilayaan, haddana mas’uuliyadda ilaalinta nolosha dadka Kenyaanka ah iyo hantidooda iyo sidoo kale in la soo xiro marka loo baahdo ay mas’uul ka tahay adeegga booliska qaranka.
“Maaddaama uu soo shaac baxay warka wasiir Muturi, waxaan hadda haynaa cidda iyo hay’adaha dawladdu ay afduubka ku hayaan dhallinyaradeenna, sidaas darteed waxaan ugu baaqaynaa in uu si deg-deg ah isu casilo gaashaanle sare Nuuradiin Xaaji,” ayuu yiri Omulo.
Waxa uu intaas kusii daray “Waxaana hay’adaha ay qusayso ka codsanaynaa in ay baaris ku sameeyaan, lana caddeeyo doorka uu ku leeyahay kiisaska afduubka.”
Mowjadda afduubka ayaa bilowday kadib mudaharaadyo looga soo horjeeday canshuur kordhin bishii June ee sanadkii tegay, waana ay sii socotay tan iyo markaas.
Qaar kamid ah dadka la afduubay ayaa la sii daayay kadib cadaadis dadweyne, halka kuwa kale illaa hadaa la la’yahay.
