Kooxda Barcelona ayaa marti galin doonta kooxda Borussia Dortmund kulan ka tirsan kulankii 5-aad ee wareega Group-yada tartanka champions League xilli ciyaareedkan.
Barcelona oo raadinaysa in ay iska xaadiriso wareega 16-ka ayaa kulanka u soo galaysa iyaga oo ay ka go,antahay in ay guul ka gaadho kulanka wax walba oo ay ku qaadato.
Dhanka kale kooxda Borussia Dortmund oo dhankeeda u dagaalamaysa sidii ay ugu soo bixi lahayd ayaa kulanka u soo galaysa in ay ka yaabsato kooxda Barcelona.
Kulanka: Barcelona Vs Borussia Dortmund
Tartanka: Champions League
Wakhtiga: 11:00 Habeenimo
Garoonka: Camp Nou
XAQIIQOOYINKA KULANKA:
Barcelona ayaan waligeed guuldaro kala kulmin kooxda Borussia Dortmund tartamada yurub iyaga oo ka badbaaday guuldaro 3 kulan oo ay horay ula ciyaareen hal guul iyo 2 bar-baro ayay kala kulmeen.
Kulankii hore ee yurub ahaa ee ay Borussia Dortmund ku ciyaartay Camp Nou ayaa dhacay January 1998 kulankaas oo ahaa European Super Cup Final kana tirsanaa lugta 1-aad waxana ay la kulmeen guuldaro 2/0 ah.
Barcelona ayaa badisay 13 ka mid ah 15-mii kulan ee ay garoonkeeda ku marti galisay kooxaha reer Germany iyada oo 2-da guuldaro ee ay la kulmeen tahay kooxda Bayern Munich iyaga oo guuldaro kala kulmay (2/1 November 1998 iyo 3/0 May 2013).
Barcelona ayaa bar-baro 0/0 ah la gashay Slavia Prague kulankii 4-aad ee wareega Group-yada xilli ciyaareedkan champions League waxana uu ahaa kulankii 11-aad ee ka tirsanaa 124 kulan oo ay ku ciyaartay garoonkeeda oo ayna wax gool ah dhalin.
