Wasiirka Wasaaradda Batroolka iyo Macdanta Xukuumadda Fedaraalka Soomaaliya Daahir Shire Maxamed ayaa maanta heshiis muhiim ah kula saxiixday magaalada Ankara ee dalka Turkiga dhigiisa dalkaas Wasiirka Tamarta iyo Kheyraadka Dabiiciga ah ee Turkiga Alparslan Bayraktar.
Labada Wasiir ayaa si rasmi ah u kala saxiixday heshiis istiraatiiji ah oo lagu xoojinayo iskaashiga dhanka tamarta ee u dhexeeya Soomaaliya iyo Turkiga, waxaana labada dhinac ay ku heshiiyeen in dhanka Biriga laga bilaabo howlgal sahamin shidaal ah oo laga sameynayo dhulka gudaha dalka (Onshore Blocks).
Wasiirka Batroolka iyo Macdanta Daahir Shire oo ku sugan dalka Turkiga ayaa waraysi uu siiyay Warbaahinta Qaranka ayaa faahfaahin ka bixiyay heshiiska cusub ee maanta ay wada gaareen labada dowladood ee Turkiga iyo Soomaaliya.
“Heshiiskaan waa mid cusub oo la xariira sahmin lagu sameynayo shidaalka Beriga, Maadama ay jirto baahi loo qabo shidaalka biriga, waxaan la saxiinayay Turkiga oo si lamid ah sahminta dhanka Badda ah ee Turkiga uu wado inaan birigana uga faa’ideysoboo waliba waxaa sii dhib yar oo qarash yar dhanka biriga, Shidaal sahminta dhanka Badda way socota oo meel wanaagsan ayay mareysa waxaana go’aanada rasmiga ah ee baarista sahminta shidaalka badda waxaa la heli doona waxii ka dambeeya bisha May ee sanadkaan” ayuu yiri Wasiir Daahir Shire.
Heshiiskaan dhexmaray Soomaaliya iyo Turkiga ayaa la tilmaamay iney fulin doonaan Shirkaddaha labada dowladood ee dhanka Shidaalka oo kala ah (TPAO) oo Turki ah iyo Shirkadda Shidaalka Soomaaliyeed (SPA).
“Soomaaliya waxay hawlo sahaminta dhulka ah (seismic surveys) oo laba-gees iyo saddex-gees ah (2D & 3D) oo lagu sameynayo saddex dhul oo isku wareeg ah 16,000 KM². Marka sahankaasi la dhameeyo, waxaa lagu guda geli doonaa hawlaha qodista iyadoo la tixraacayo natiijooyinka sahanka” ayaa lagu yiri qoraal kasoo baxay Wasaaradda Batroolka Soomaaliya.
Heshiikaan cusub ayaa muujinaya dadaalada horumarka leh oo ay ka gaareyso dowladda Soomaaliya dhinaca kheyraadka dabiiciga ah ee dalka, waxayna u gogol xaareysaa wejigii labaad ee sahaminta dhulka, iyadoo haatan uu Wasiirku sheegay inuu meel gabagabo ah marayo howlaha sahminta ee lagu sameeyay Shidaalka badda Soomaaliya.
Ugu dambeyntii Wasiir Daahire Shire ayaa rajo weyn ka muujiyay in iskaashigan uu noqon doono mid miro dhal ah, kana qeyb qaata kobcinta dhaqaalaha dalka, abuurista fursado shaqo, iyo xoojinta xiriirka laba geesoodka ah ee u dhaxeeya Soomaaliya iyo Turkiga. Do
